اذن ور توی گئجه سی من ده سنه دایه گلیم ال قاتاندا سنه مشاطه ،تماشایه گلیم
سن بو مهتاب گئجه سی سیره چیخان بیر سرو اول اذن وئر، منده دالنجا سورونوب سایه گلیم
منه ده باخدین او شهلاگوءزوله،من قاراگون جرئتیم اولمادی بیر کلمه تمنایه گلیم
من جهنم ده ده باش یاسدیقا قویسام سنیله هئچ اییلمام کی دوروب جنت ماءوایه گلیم
ننه قارنیدادا سنله اءکیز اولسیدیم اگر ایسته مردیم دوغولوب بیرده بو دنیایه گلیم
سن یاتیب جنتی روءیاده گورنده گئجه لر منده جنتده قوش اوللام،کی او رویایه گلیم
قیتلیغ ایللر یاغشی تک قورویوب گوءز یاشیمیز کوی عشقونده گرکء بیرده مصلایه گلیم
سنده صحرایه مارال لار گیمی بیر چیخ،نولی کی منده بیر صیده چیخانلار کیمی،صحرایه گلیم
اللاهوندان سن اگر قورخمیوب،اولسان ترسا قورخورام منده دوءنوب دین مسیحایه گلیم
شیخ صنعان کیمی دونقوز اوتاریب ایللرجه سنی بیر گوءرمک ایچون معبد ترسایه گلیم
یوخ صنم!انلامادیم،انلامادیم،حاشا من بوراخیم مسجدیمی،سنله گلیسایه گلیم!
گل چیخاق طور تجلایه،سن اول جلوه ی طور منده موسی گیمی،او طوره تجلایه گلیم
شیردیر<شهریار>ین شعری،الینده شمشیر کیم دئیه ر من بئله بیر شیر له دعوایه گلیم؟